“ QANUN BENDERA “ (Hikayat)

“ QANUN BENDERA “ 

Oleh :Tgk Diyueb Bruek

Yoeh wafeut Wali,jiteuka Geumpa
Ujeun pih Raya,seu minggu 
Wasiet pusaka, Wali amanat
Nyan Qanun Wali,Meuphoen juet dawa
Qanun Bendera,Jinoe hai sahbat

Meupakon meunan, di DPRA
Qanun di cipta, juet karu Rakyat
Miseu umpama, ulon calitra
Qanun bendera,pakon juet silap

Aceh jamuen kon, kana bendera
Kupue jituka, laen jikarat
Nyan Alam peudueng,Meuhoe jinuek ba
Bendera Pusaka, Aceh berdaulat

Ngoen Cap sikurueng,lam jaroe Raja
Pue na rencana,tuka lom meuhat
Seubab tan muphoem, seujarah bangsa
Hantom jibaca,Aceh berdaulat

Pidueng meupucoek,tampoek suasa
Buluen Purnama, ngoen bintang takat
Mupue Meukeusud, lambang Bendera
Pakoen Wareuna,geuboeh mirah that

Meukesud pidueng, Lambang Bendera
Bah lon calitra, supaya mupat
Meunyang peuteupat,Hukom Negara
Hana geubeda, bah anuek jasat

Yoeh mirah pupoek, Iskadar Muda
Seubab meuzina, peudueng peuteupat
Di sinan saboeh, na hadih maja 
Deungoe saudara, bacut lon surat
Wate geupancoeng, meunyan anuekda
Meunoe ban haba, Raja berdaulat
Meu mate anuek, tatupat jeurat
Meu gadoeh adat, han pat tamita

Bintang ngoen buleun,pakriban kisah
Wareuna mirah,Mupue isyarat
Atra pusaka, Endatu keubah
Dalam seujarah,neubaca leugat

Aceh geukutoek, tuwoe seujarah
Durhaka nan bah,deungan syuhada
Qanun Bendera, misue lon peugah
Mupue keuh salah, pakoen jituka

Bek gara bacut ,tumut lungkiek pha 
Tacue ngoen nuga, bangkaran meuhat
Apue lam seukeum, hanasoe duga
Peunyaket lama,puleh goeh goet that
Meusalah pantang ,jibeudoeh teuma

Meunyan pih hana,pat mita ubat
Hana le tabib ,ek bri peuna wa
Kareuna hana ,nek rabi meuhat
Nek rabi tanjoeng, cut samalanga

Raja peunawa, yang ek bri ubat
Indatu sihe ,ateuh rhueng donya
Gobnyan kahana, mate katreb that

( Tgk.Diyueb Bruek,26 Maret 2013)